Udin Karuik

UDIN Karuik iyo subana tabedo. Urang nan bajudi inyo nan sakik kapalo. Lieklah dek sanak, kaniangnyo indak pernah licin, karuik taruih bantuak kulik pariyo.

“Baa indak ka paniang awak dek inyo, spanduk kampanye ko manyarok di muko kadai Uwo,” kecek Udin.

“Manga pulo angku nan ribuik, bantuak angku bini Uwo sajo,” tukeh si Tadin sambia maambiak kacang tujin jo tangan kidanyo.

Nan lain galak tasengeang mandanganyo. Tamasuak pulo Uwo nan mambuek kopi untuak si Udin Karuik nan baru tibo jo sepeda untonyo.

Kasadonyo urang simpang alah tahu nan banamo Uwo iyo indak punyo bini sajak dahulu kalanyo. Marando tagang (antah apo nan tagang) sajak inyo ado di dunie ko.

Kalau nan Uwo iyo bantuak patugeh stasiun mancaliak Mak Itam tibo. Tangannyo sigap mambuek kopi sajak si Udin masih mangakeh dari jauah, sabalun manggeleang-geleang di muko spanduk jo baliho tu bantuak karo.

“Cubolah pikia,” kecek si Udin maampehan ikuanyo nan lah kareh dek sadel Unto di palanta Uwo. “Sia urang-urang nan galak ka kito tu, mangaku sanak jo saudaro.”

“Ambo iyo heran bana,” keceknyo. “Baralah abih pitih urang-urang ko, satiok simpang ado baliho nyo, ado pulo nan gadang bagai bantuak iklan okok si Jono.”

“Itu indak usah heran lai,” kecek si Jono nan sadang manyudu okok LA dari cako. “Iko bantuak usaho, bamodal dulu baru balabo, duo ratuih tigo ratuih itu biaso, beko kalau jadi sabanta bisa balabo,” tambah anak toke oto tambangan ka Pasa Raya tu.

“Duo ratuih tigo ratuih apo ko? Kalau juta iyo. indak bisa ambo maagak lai, inyo lapia ka usaho iyo bisa jaleh hasilnyo, batambah pulo lapangan karajo anak-kamanakan kito,” keceknyo.

“Kecek awak tantu iyo, tapi urang-urang ko kan alah punyo usaho, ado nan banyak pulo, bosan inyo jo usaho nan bantuak itu, kino usaho wakia rakyaik lai, kalau duduak, limo tahun mamakan gaji buto, sambia ka lua nagari pulo,” kecek si Tadin manggaruik kakinyo.

“Ha, iko nyo, banyak pulo nan indak punyo usaho, tapi balihonyo ikuik gadang pulo, kalau indak tapiliah pasti tacido, ka gaduik kasudahannyo,” kecek si Udin Karuik.

Iyolah urang kini, kecek si Udin dalam hati. Suko bondong aia,bondong dadak.. Kamano aia  mengalia ka sinan inyo uru-uru. Urang pasang baliho, inyo sato pulo, bapacu bantuak kudo bendi. Indak pulo ingek, urang punyo kudo jo bendi, awak hanyo punyo palacuiknyo.

“Tapi indak baa tu doh Mak Udin, awak indak kenal jo inyo sorang sajo, indak kawan indak saudaro, bantuak urang di iklan rokok tu, cengengesan sajo....” kato si Jono.
“Iyo indak kenal, tapi angku manduduiknyo, tamakan kajai dek iklan sarupo ko,” baleh si Udin.

Iyolah dek si Udin Karuik, indak ado nan indak manjadi masalah. Inyo sajo nan mancari lawan ka baliho-baliho ko. Padahal urang nan di gambar-gambar tu alah ramah tajelo-jelo....mohon doa restu, mohon dukungan, dukuang ambo dunsanak....

Bakerok bunyi Unto si Udin katiko dikayuah manjauah dari lapau Uwo. Indak disangko, tabayang pulo dek inyo bara sanang pulo inyo punyo baliho. Duduak gagah di ateh sadel Untonyo. Di bawahnyo ado kato-kato, “Mohon Doa Restu untuak Sepeda unto jo Rang Punyo-nyo ka Sinayan manjadi Wakil Kito Basamo.”

Si Udin laruik jo lamunannyo, sampai lampu merah jo hondoh sajo. Mambuek polisi di simpang ampek geleang kapalo.