"Curiga indak tapi hati badatak...."

Sajak gampo, labiah sapakan Jila
indak beredar di tangah masyarakat kampuangnyo lai. Apo garan nan
tajadi? Atang indak sanang hati mamikiean nasib konco palangkinnyo
tudo. Dek karano tu nyo pai turuik ka rumah si Jila. Batue dugaan
Atang, kantinyo tu lah dek kuro, badannyo manggigie-gigie, incek
matonyo tabudue merah, giginyo mangaretek, iduangnyo baraie.
“Lah
dek apo waang Jila. Sajak bilo se waang bantuek iko, angin apo nan
waang iruik, apo nan waang padek an?” tanyo Atang mangkatutuih di tapi
tampek tidua Jila nan sadang tatilantang.
“Aden sendiri juo heran jo diri den, tak panah-panah aden bantuek iko do, sakaliko baru”, jawek Jila parau.
“Bantuek urang sakaw nampak dik den mah Jila”, solo Atang.
“Bakto kawan. Waang lah gilo gakti den. Wadenlo waang kecek an sakaw,” garetang Jila.
“Sajak
gampo kapatangko banyak lurah, walinagari nan sakik bantuak urang dapek
sakaw. Satiok kalua pitih lauak pauak dari Pemda, kutiko ka dibagian ka
masyarakat nan korban gampo, lurah sakik, walinagari damam, walijorong
paniang. Kasudahannyo pitih lauak pauak indak jadi dibagian doh,” kato
Atang.
“Waden dapek sakaw kecek waang? Kok anak mudo iyo banyak bana
kini nan sakaw, baiek dek sabu-sabu, putaw atau ganja, den baco di
koran-koran hampie tiok ari ado anak mudo nan tatangkok dek karano
mambawo barang haramtu, tapi tantangan apak-apak nan sakaw, iyo agak
ganjie tadanga di talingo den, apolai adenlo nan waang tudueh sakaw,”
jawek Jila tasingguang.
“Gakti den waang sato daman pulo saroman lurah nan lain-lain tumah,” solo Atang.
“Indak gai doh”.
“Jaan waang paturuik an bana, jaan masuak ati bana parsoalan ko, santai se lah, rileks Jila,” umbuak Atang.
“Baa den ka santai kecek ang, uranglah kasak kusuak ka ateh ka bawah, aden ko dek kuro sarupo iko,” garuang Jila.
“Tantu
iyo kasak kusuak. Bareh, indo mie, minyak manih bantuan untuak urang
nan kanai gampo tu alun juo babagian lai. Waang ungguak an sajo di
kantua lurah. Jaan jaan beko waang didemo pulo dek masyarakat.”
“Baa ko baitu pandapek waang? Curiga masyarakat tu ka waden?” tanyo Jila.
“Curiga indak, hati badatak iyo.”
“Baa baitu?”
“Kutiko
gampo nan dek sari, banyak urang nan tibo-tibo jadi kayo.
Dipareso-pareso, tanyato barang bantuan gampo tu nan dilegonyo.
Jujurselah Jila!” kato Atang.
“Salamoko den indak jujur manuruik ang.”
“Indak
baitu bana do kanti. Tapi apo bana nan ka waang kaja dalam hiduik ko?
Nak capek kayo? Kadang-kadang baa dek ang, jabatan waang nan saroman
iko kini bisa-bisa mambukakkan kakurangan, aib awak nan salamoko indak
tampak dek urang banyak, apolai zaman gilo kiniko, sajak buayo
manantang cacak bacakak”.
“Sabagai sahabat lamo, sabagai urang dakek jo waden, baa nan rancak?” tanyo Jila.
“Biaso-biaso
selah. Kalau tibo pitih lauak pauak, bagian capek ka urang-urang nan
kana gampo tu. Kalau tibo bantuan bareh, bagi. Lai kajadi dapek
satekoang surang. Waang ko harus jujur. Kalau waang sabana jujur, den
yakin sakaw wang tu pasti hilang mah,” kato Atang. (Wisran Hadi)


kolom : Wisran Hadi di Padang Today